jbl.no

Fremst står ein forventningsfulle Kaizerfamilie klare til å ønskja favorittbandet velkomen heim.

- Eg vart fan først i fjor, men har allereie lært meg alle songane. Eg har vore på ein del konsertar, men har aldri gleda meg så mykje som no, seier Edel Singh, som saman med Michelle Bjerklund har venta sidan klokka tolv for å sikra seg dei beste plassane.

Dei hyler av glede idet ei gassmaske dukkar opp på scena. Sekstetten er på heimebane og ønskjer nye og gamle festivaldeltakarar velkomne til Jæren. Det stappfulle torget jublar tilbake.

Sjå fleire bilder frå Jærnåttå her.

Kjært band

- Det er kjekt å vera heime igjen, ikkje sant Geir? Her skjønar alle kva me seier, seier Janove Ottesen frå scena.

Vokalisten kastar jakka og festen er i gong. Publikumsresponsen er like høglydt som alltid. Enno høgare vert den idet vokalisten slenger eit kyss under "Hjerteknusar". Det er ingen tvil om at gjensynsgleda er stor mellom fansen og bandet på heimebane.

Feststemt torg

"Ein for orgelet og ein for meg" og "Diamant til kull" får publikum til å gynga. Den eldste popsongen, "Prosessen", vert etterfølgt av "Ompa til du dør". Publikum dansar i takt med melodien.

- Kom igjen Bryne, ropar vokalisten.

Eit feststemt Brynetorg er ikkje vanskelege å be. Midt i "Svarte katter og flosshatter" kjem ein kunstpause, og mot slutten får solajentene ønskjelista servert som perler på ei snor. Publikum klarar til og med å kara til seg fleire ekstranummer, før dei avsluttar med "Maestro".

Sjarmert i senk

- Det heilt sjukt. Dei sjarmerte oss i senk denne gongen også. Kva var best? Heile showet. Janove smilte og vinka til meg, så eg fekk litt merksemd. Eg prøvde å vinke til Geir og, men det er kanskje vanskeleg å vinka tilbake med gitar, seier Edel andpustent og engasjert.

Då er det berre å drøyma vidare til neste Jærnåttå, for Kaizerfamilien har lova at dei skal møtast igjen neste år.

Les meir om Jærnåttå i Jærbladet måndag.

Kommentarer