jbl.no

I sommar har Jærbladet vist at handelen i kjøpesentra på Jæren aukar. Handelen ved M44 på Bryne auka med heile 19,2 prosent frå først halvår i 2011 til same periode i år. Og Jærhagen i Klepp melder om ein god auke i sommarhandelen frå juli i fjor til juli dette året.

Senterleiar Siri Øksnevad Olsen ved Jærhagen trudde aldri at juliomsetnaden i år ville overstige juli i fjor. Ho seier dårleg ver er ein av grunnane til auka sommarhandel. Det gjeld både årets og fjorårets rekordar ved Jærhagen.

Også omsetnaden for sommaren ved senter i Hå ser ut til å ha ei positiv utvikling.
Statistisk sentralbyrå (SSB) viser at omsetnad i detaljhandel (unnateke køyrety og bensin og utan meirverdiavgift) per innbyggjar i Klepp, Time og Hå viser ein jamn auke for Klepp og Time, medan Hå kommune har hatt ein like jamn nedgang frå 2008 til 2011. Tala frå SSB styrkjer oppfatninga om handelslekkasje nordover frå Hå, medan Klepp og Time held stand og faktisk aukar omsetnaden.

I Hå kommune vart det i 2011 ifølgje SSB-statistikken omsett for 38.969 kroner per innbyggjar, i Klepp 47.863 og i Time 81.717 kroner.

Dei høge tala frå Time betyr sjølvsagt ikkje at timebuen bruker så mykje meir enn naboane i nord og sør på detaljhandel. Tala viser at det er større utval av og langt fleire butikkar samanlikna med naboane. Difor står byen på Jæren også fram som handelssenteret på Jæren.

Det positive med auka handel på Jæren er at kjøpesentra på Jæren står fram som attraktive også for handlande frå andre kommunar. Sentra trekkjer til seg nye kundar som føretrekkjer å handle her framfor å ta turen nordover til dei større byane. Kundar som elles ville ha handla andre stader, vel heller til mindre og trivelege sentra framfor å stimle saman i større kjøpesentra.

Særleg positivt er det at jærbuen har blitt flinkare å handle i nærmiljøet. Det er utan tvil ein miljøfaktor at køyretid og avstand vert kortare samstundes som kundane får tak i det dei treng i bustadkommunane.

Ein kraftig auke i handel er samstundes eit uttrykk for auka velstand. Handel vert på mange måtar ein fritidsaktivitet like mykje som handel. Det trekkjer fleire kundar til handelssentra. På denne bakgrunn er det ikkje vanskeleg å forstå senterleiarane sine ønskje om fleire stader der ein kan kjøpe mat. Det vil utan tvil vere med og trekkje nye besøkjande til både sentra og butikk-kassane.