jbl.no

- Den opprinnelege planen var oppstart i januar og full produksjon til sommaren. Då me kom fram til sommaren, såg me at det klarte me ikkje, seier regiondirektør Anne Siri Høiland i Tine Meieriet Sør.

Voll meieri skulle produsert ut mai, men i forhold til gjeldande plan er produksjonen forlenga til midten av august. Nærbø Meieri skulle avslutta produksjonen til sommeren, dei har fått forlenga produksjonen ut 2012 om det trengst.

Utfordrande

Å køyra i gang produksjonen på Norges største meieri byr på mange utfordringar. Eit stort antall prosess- og pakkeliner og produkt skal køyrast i gang, delvis parallelt. Nokre av leverandørane har hatt uventa store utfordringar med å få levert på tida. Summen av større og mindre tilpassingar og korreksjonar på utstyr og automasjonsprogram har gjort prøveproduksjonen krevjande, fortel Tine i eit informasjonsskriv til eigarane sine.

- Det er eit stort og komplekst nytt anlegg med mange nye liner. Utfordringar har vore tilpassing av produksjonen og få den rette kvaliteten på produkta, men eg ser optimistisk på framdriftsplanen, seier regiondirektøren Anne Siri Høiland. Mykje har og gått svært bra med det nye anlegget. Feittprodukt som smør og margarin er i full produksjon, med gode kvalitetsprodukt på begge.

Det er særleg prøveproduksjon av ost som har bydd på problem.

Ost tek tid

- Det har tatt lenger tid å få i gang produksjonen av ost enn rekna med, den skal modnast, noko av den treng veker, andre månader. Spesielt Mozzarella har vist seg utfordrande, men me har òg hatt nokre utfordringar med Norvegia og Jarlsberg. Før me trappar opp osteproduksjonen, må me vera sikre på at kvaliteten er god nok. Me treng meir tid, men reknar med at ved utgangen av året har det gått seg til, seier regiondirektøren.

Forseinka utstyr til produksjon av mysepulver gjorde sitt til at dei ikkje kom i gang som planlagt, men også denne produksjonen vert trappa opp no i august.

For å få ein sikker produksjon av Norvegia og Jarlsberg gjennom sommaren vart det bestemt å forlenga produksjonen på Voll til midt i august. Tine såg og eit behov for å ha eit av dei gamle anlegga i beredskap/produksjon ut 2012 for å ha sikker produksjon. Nærbø Meieri vart valt, og det er lagt opp til ein liten produksjon ut dette året.

Meir mjølk

Også Voll Meieri har hatt større produksjon enn planlagt i sommar.

- Det kjem inn meir mjølk enn planlagt, men det er i tråd med det styresmaktene har stimulert til. Voll hadde kapasitet til å ta imot, seier regiondirektøren.

- Får innkøyringsvanskane konsekvensar for Tine?
- Me skulle gjerne fått alt samla i Kviamarka, men meieria ligg nær kvarandre og det gir ein stor fleksibilitet å kunne bruka dei gamle meieria slik me no kan i innkøyringsfasen for det nye, seier Anne Siri Høiland.

Kommentarer