jbl.no

Tine Meieriet Jæren i Kviamarka skulle hatt full produksjon frå sommaren. Men slik vart det ikkje. Innkøyringa av Norges største meieri har teke lenger tid enn planlagt.

Produksjonar som smør og margarin går godt, og produkta har god kvalitet. Då er det verre med prøveproduksjonen av ost. Her har det oppstått problem som gjer at det har vore vanskeleg å setje i gang full produksjon. Meieriet i Kviamarka skal produsere både Norvegia, Jarlsberg og Mozzarella.

Det nye meieriet har eit stort og komplisert anlegg. Så lenge dei ikkje er sikre på kvaliteten, kan ikkje meieriet trappe opp osteproduksjonen. Leiinga ved meieriet reknar med at produksjonen ikkje vil gå for fullt før ved utgangen av året.

Det betyr at denne delen av produksjonen ved meieriet vert utsett eit halvt år. Meierianlegga på Voll og Nærbø må difor forlengje drifta for å produsere nok ost.

Planlegginga av stormeieriet har teke lang tid, og vi forstår godt at det er mange ting som skal klaffe før det vert full drift ved anlegget. Tine har mange og dyktige fagfolk med lang erfaring frå osteproduksjon. Dei veit at det krevst tid å setje i gang produksjon ved nye anlegg. Då er det litt underleg at osteproduksjonen kan bli usett med eit halvt år.

Har ting gått for fort? Og har det vore viktigare å kome i gang med drifta av stormeieriet framfor å sikre kvaliteten på produkta? Vi håper ikkje det. Ved så store anlegg vil det mest alltid oppstå innkøyringsproblem.

Tine har kresne kundar som set strenge krav til kvalitet. Då går det ikkje av å slurve i faget. Det er det aller verste som kan skje. Men Tine skal ikkje berre ta omsyn til kundane. Sjølvsagt er det svært vesentleg. Også omsynet til eigarane, alle bøndene som leverer mjølk til meierianlegga, har avgjerande betydning.

Då er det positivt at meieriet vil sikre kvaliteten på produkta før dei set i gang full produksjon.

Kommentarer