jbl.no

– Å plukka ut berre ti brev vert vanskeleg. Eg har ikkje funne nokre uaktuelle brev til no i alle fall, er mjølkebonden frå Ævestad sin kommentar tidleg i underhaldingsprogrammet «Jakten på kjærligheten» på TV2.

Han vert heilt overvelda då programleiar Marthe Sveberg kjem med den svære bunka. Jærbonden deler opp breva i tre bunker. Ei bunke med dei han liker best, og ei bunke som han tykkjer meir om enn den siste bunka.
– Men det er bra alt i hop, seier han på fjernsynet.

Med god hjelp frå broren og svigerinna plukkar han til slutt ut ti friarar som me vil få sjå meir til på TV i haust.

Til VG avslører Ueland at jakta gjev resultat, og at han har funne tonen med ei av jentene.

Tomt utan kjærast

Garden på Ævestad husar cirka 50 melkekyr, 30 purker, ein hund og ein katt. I nabohuset bur farfaren og stort sett har Anders Braut Ueland dottera si, Ane på to år, hjå seg. Han er med andre ord ikkje heilt åleine, men synest det har vore litt tomt utan kjærast.

Då Jærbladet intervjua Vigrestad-karen tidlegare i sommar, sa han at han håpa å finna ei gild, blid og omsorgsfull dame med litt tak i.

Utdanna i forsvaret

Anders Braut Ueland er fødd og oppvaksen på garden han no bur på. Som ung var det stort sett berre fotball som stod i hovudet på bondesonen, og han starta etter kvart på idrettslinja ved Bryne vidaregåande skule. Det var aldri sikkert at han skulle verta bonde.

Etter vidaregåande gjekk han på befalskulen, og utdanna seg i forsvaret. Han var både på Rena, i Kosovo og i Nord-Noreg.

Ueland overtok garden i 2006, og dreiv i to år før allergiproblem melde seg.
- Eg tok så ein pause og jobba i forsvaret og fekk bygd om fjøset. Med ein meir modernisert kvardag har allergien vorte mykje betre, seier ein glad Ueland.

Kommentarer