jbl.no

Brit Johanne Orre har selt brudekjolar på Bryne i ni år. Først som tilsett hjå Kari Lagestrand, deretter som eigar av tradisjonsrike Brudesalongen. I år runda salongen 30 år.

– Nok er nok, og eg kjenner meg klar for nye oppgåver. Eg veit enno ikkje kva eg skal til med, men eg er heilt sikkert brukande til eit eller anna, seier Brit Johanne Orre.

Ho bestemte seg eigentleg for å avvikla i fjor. Sidan april har ho forsøkt å selja salongen, men ho har enno ikkje lukkast.

Kontrakten med huseigaren i Meierigata er sagt opp frå 1. oktober.

– Eg har godt med kundar, og berre denne helga leverer eg ut seks kjolar. Men dersom eg skulle halde fram, ville eg nok prøvd og skaffa meg nye lokale i Storgata. Det handlar om å vera der det er mest folk og trafikk, meiner Brit Johanne Orre.

Brudesalongen på Bryne sel brudekjolar og leiger ut kjolar til barn og dressar til vaksne.

Brit Johanne Orre har likt arbeidet i brudesalongen, men ho saknar kollegaer.

– Eg må vera der det skjer, og eg er for sosial til å sitja her åleine, slår 49-åringen fast.

Ho kallar seg sjølv ei «allsidig potet».

– Eg er utdanna dekoratør, og har arbeidd med mykje forskjellig. Det blir spennande å sjå kva det neste blir.

Kommentarer